kadang nyong sing ditekani rasa wedi..
apa kudu mlayu..
umpetan ng keleke waktu..
padahal kwe kudu diadepi..
padahal kwe kudu dilakoni..
rasa mangmang sing kadang ngampiri..
misiki ning kuping kiwa..
apa kudu iya apa kudu ora..
sewu prasaan mangmang karo wedi..
akhire tak taleni dadi siji..
tak balangna kentir ning kali..
seminggah sing adoh hei perasaan wedi..
seminggah sing adoh hei perasaan mangmang..
urip kudu diadepi..
urip kudu ditaklukkan.....
2. PENGAREPAN
ning matane kowen ana sergenge..
madangi ati-ati kiye..
pengarepan sINg wis mati separo..
merga "stroke"
diantem watu2 sing nyumpel dalane getih penguripan..
merga kelangan sINg dicolong paksa..
lendek2 "ati-ati" sg gelem ngadeg..
dejak mlaku alon2..
dituntun kowen..
ngliwati ademe udara sing ngresiki paru-paru
"sing wis bebel merga kakeyan nyedot mambune “polusi...”
tumplekane gas hasil serakahe menungsa....
3. SEDULUR LANANG TUWA
sanajan nyong belih bakal kober...
tak belek waktu nggo nemoni rika...
khusus nggo rika..
sedulur lanang tuwa...
sing bakal tak panggul ning gegere nyong...
kasih sayange rika sing umeb ning getih...
dadi pangeling...
waktu nyong lara...
waktu nyong dadi gedibal...
rika sing ngreyok nyong...
rika sing ngekepi nyong...
sedulur lanang tuwa sing nglorod luh banyu matane nyong...
nyong ning kene kepengin ngambung tangane rika...
4. KAYALAN
angen-angen sing klendangan..
nongkrong ning pucuk-pucuke uwit..
kepengin nyengget wulan..
kepengin nyengget lintang..
ujug-ujug ngedeblug..
nyong sing keplesed..
nyong sing tiba..
nyong sing ning kene njengkangkang..
nyong sing isin karo lemah..
atine nyong pecah kaya talawengkar..
5. KREKELAN
ning ngisore jaman..
menungsa sing diedek-edek..
menungsa sg pada krekelan ning uwit atine jaman..
nyengget manise uwohe kasih sayang..
kasih sayange jaman..
tapi udan barat karo gludug sing ngampar2..
nglorod sikil-sikil sing lagi krekelan..
uwoh sing akhire ora bisa ke unduh..
tetep kleleran..
tetep diedek-edek..
jaman sing pancen ora tau bala ..
dadi musuh selawase....
6. BALEN
hai, sewu kenikmatan..
tulung kandakna nyong
apa sih artine “selingkuh”...
lan kowen hei “bahagia”
tulung kandakna maring nyong
apa sih artine “kesetiaan”
wahai bengi..
wahai wulan..
kowen nekakna mene remeng-remeng..
karo semriwinge angin..
ngejak nyok ngglegek pirang-pirang ewu nikmat..
wahai awan,
wahai serngenge,
kowen nyeteter semelete kulit
ning padange atui ngelingna nyong
pancen ana wong sing dilelara
7. KANGEN
ning endi kangen kiye pan tak benahi..
ari rasa wis ora bisa dejak umpetan..
kowen sing lunga kegawa angin ora gelem dejak balik..
lawang kiye saprene megin ngeblag..
megin ngeblag..
nyong ngadeg ning kene..
ning watese batin sing keronto-ronto..
ngenteni kowen..
...... ngenteni kowen.........
8. GEDIBAL
ati sing lagi sutang ndempes ning empere bengi..
kelingan jaman semana..
angin sing ujug-ujug marani nggawa atis,
ninggil-ninggil awak sing lagi ledreg..
krasane tekan balung..
ya tekan nganti balung..
sing tau mentiung ora kuwat nggo mlaku..
ora kuat nggo apa2..
nyong sing lagi dadi gedibal..
dibalangna..
dipuntir-puntir..
didoni...
diedek-edek ning njerone jaman..
waktu kuwe...
waktu nyong mati nang sajerone urip...
9. TAREKAT
blajar mlaku ning nduwure dalan sya'reat..
brangkangan..
ketingklangan..
kesrimped-srimped..
batuk sing nempel ning sajadah..
nunggu kabar sing istighfar..
mursyid tulung jejegna mlakune nyong..
nyong njaluk ijazah..
10. RAHASIA ATI
raine kowen sing tak selagna ning lorogan ati kiye..
tak umpetna rapet-rapet..
mbuh mbangkana bakale kepriben..
kaya kemricike banyu sing mili,
iramane ati sing tak jorna..
kowen sing ning kana..
nyong belih bisa apa-apa..
nyong mung bisane meneng..
kaya watu sing ditukuli lumut,
sing tukule langka sing nandur..
mbrabah sekarepe dewek..
kaya raine kowen sing tak selagna ning lorogan ati kiye..
tak umpetna..
embuh sampe kapan....
11. MAQOM
aja kaya kuwe ari ora bisa kaya kuwe..
kaya kiye ari pancene kudu kaya kiye..
samene ya wis pancene samene..
samono ya wis pancen kudune samono..
pan luruh luwihan ya kena sing penting ora olih otil..
sikut kana sikut kene..
jejek kana jejek kene..
12. WASKAT
wulan sing dititipi bengi..
matane terus mecece..
ngindik ning mburine blarak-blarak
sing oyag didamoni angin..
nyong sing kridongan pan clutak..
ora bisa obah..
ora bisa apa-apa..
wulan sing terus mecece..
nggawe mengkerede ati..
wulan tulung padangi..
kabeh sing arane nyolong,
korupsi, tipu2 lan clutak2 liyane..
13. DHUHUR
..serngenge ning mbun-mbunan..
mantul ning mustaka mesjid sing mengkilat..
adan bedug ngawe2..
nggered sedelat liren penggaweyan..
banyu wudu nyirami semelete penter..
ning kene..
ning sajerone ati sing grobyosan kringet..
merga mlayu sing laka pudate..
merga ngejar dunya sing ora tau ke kejar..
ayo sedulur pada liren sembayang duhur..
14. NAFSU
ning sajerone ngelihe nyong
waktu ndeleng sega karo lawuh sing kemebul
ana napsu sing tak elus-elus aja bae "dobal"...
ning sajerone ngoronge nyong
waktu ndeleng banyu sing cemreces
ana napsu sing tak elus-elus aja bae "gemrangsang"...
ning sajerone ngacenge nyong
waktu ndeleng pupu sing melong2 ana napsu sing tak elus-elus...aja bae...
15. NJARING AGIN
Ning tanjakan kiye nyong njaring angin...
waktu nyong ngresula karo sing nggawe angin...
waktu segala dekene nyong kawur...
diterjang angin...
Ning ngisor kene nyong nambak banyu...
waktu nyong ngresula karo sing gawe banyu...
waktu segala dekene nyong kentir kegawak banyu...
Duh Gusti, nyong sing pernah klalen...
Ancik-ancike lemah tapi mandenge langit...
Kesandung...
Njengkangkang...
Nyong sing klalen karo sing ning ngisor..
16. KENANGAN
nyong kelingan jaman semana..
ninggalna kowen ning gada-gada watese desa..
luh sing mrembes netes ning pipi..
tangan sing gemeter dadah-dadah..
numpak sepur ninggalna kenangan..
kenangan sg ora bakal bisa klalen..
waktu kuwe..
waktu kowen tak ambung ning ngisore wit albasia..
waktu kowen tak glelengna ning nduwure suket..
waktu kowen tak cempedna ning kandang wedus...
ah kowen saiki nang endi?..
17. NGENTENI
ning nduwure wedi sing keseyak ombak..
aku mandeng serngenge sing isin..
alon-alon umpetan..
ning sikile langit..
ning longane dina..
bengi manjat sayak suwe sayak atis..
manuk laut sing wis laka abane..
aku megin ning kene..
ngadeg..
nglekgleg..
ngenteni kowen..
wong ayu sing lunga digawak angin..
18. FATAMORGANA
utek sing diperes dadi getih..
mili sedawane kali sing laka pucuke..
menungsa ngoyo ngejar adeg-adege penguripan..
ana sing ngesod..
ana sing mbrangkang..
ana sing mlaku..
ana sing mlayu..
urip nganti pada kejengkang..
merga dalane lunyu..
pating pencelat..
menungsa sing pada mlayu ngejar apa lan apa..
"apa bae"..
padahal laka apa-apa..
padahal semu..
padahal fatamorgana...
19. SATRIYA-ne JAMAN
tumbak lanangan nancep ning sawijine jaman..
dadi anak sing laire ning nduwure alang-alang..
dadi menungsa sing nyorat-nyoret ireng putihe jaman..
dadi satriya sing omongane gejar gejur langka tedeng aling-aling..
mbongkar sakabehe..
mbongkar borok-borok..
mbongkar segalane kemunafikan...
satriya kapan kowen lair..
ning tangan tengene kowen obor...
sing genine mulad2...
mbakar raine penguasa sing pada korup..
20. WIDADARI
jam setengah siji bengi..
angin sing semriwing ning ati..
wong ayu sing ning impen..
teka marani..
widadari sing putih kulite..
ngejak nari..
nerjang alang2nge ati..
nerjang sumpeke ati..
sanajan mlaku ning nduwure eri..
belih peduli..
belih peduli..
sanajan mlaku ning nduwure geni..
belih peduli..
belih peduli....
21. GEMRUNGSUNG
wangwa sing dadi geni..
kening angin mulad2..
ning kene..
ning sajerone ati..
ora nana banyu..ora nana banyu..
Ning sajerone wengi..
aku nglangut mandeng wulan..
jembare awang-awang..
nggawa pikiran sing mlesat..
adoh mbangkana-kana..
ninggalna luh sing terus mrembes..
ning kene aku dewekan..
kowen minggat ninggalna blati..
nggesrek ati sing saiki dadi koreng..
aku wis suwe ora bisa ngomong..
sajege kowen langka..
ninggalna ati sing saiki wis tak lempit...
tak lempit...
sajerone lemari wesi..
sing kuncine tak guwang ning kali...
22. TLEMBUK REFORMASI
waktu nonton berita,
ning endi-endi rakyat sing di lelara
kowen sing tau dadi simpenane pejabat
kowen sing akhire dilarak ati belih kolu
kedampalan metu seka dunia peteng
sanajan kelase kowen priyayi karo pejabat
Belih gelem dibagen maning duwit colongan
waktu pejabat kuwe ngaku
jebule duwit sing nggo ngudar-ngudar kutang karo cawete kowen
pancene duwite rakyat sing dicolong
kowen sing saiki ngadeg ning barisan paling ngarep
ndase digubed karo tulisan reformasi
ngoprak-ngoprak tlembuk
sing pada dadi simpenane pejabat
Hei, para tlembuk
Tulung pada tangi !!
Tangi !!
aja gelem diglelengna karo para keparate negara
aja gelem dadi bolongan sing nggo umpetane
para Koruptorrrrrrrrr..................
23. BERAG KE- PINDO
ana terange wulan
ning pojokan lambene kowen
tiba ning latare atine nyong sing garing
kaya perasaan kangen sing tak pendem
ning sajerone lambene kowen
nyong kepengin ngambung kowen sepisan maning
nyong sing lagi berag maning,
sajege pertama ndelengna matane kowen
sing landep nubles-nubles ati kiye
wayah grimis ati sing ndempes
kelingan lambe telese kowen
waktu kowen merceka
nyong tambah ledes,
klelep ning antarane watu-watu
waktu kelingan pipine kowen sing dekok
24. SEDULUR SEJATI
sedulur sejatine nyong
sing ning njerone awak
kadang dadi lemah
kadang dadi banyu
kadang dadi angin
aku sing tau lunga
ninggalna sedulur sejati dewekan
mlaku sedawane dalan digandeng karo nafsu
kesrimped-srimped alang-alang sewu mangmang
kesasar belih bisa balik
kakang kawah adi ari-ari
aku njaluk wulang wuruk bener
becik kanggo selawase..
25. DURSASANA
jaman semana
raimu tau nggawe koreng
ning atine nyong
remuk bubuk sa walang-walang
semelete lambene kowen
wis ngalahna serngenge
sing ngentak-ngentak jam rolas
raine kowen wis tak ibaratna
bergijilan sing pan tak tempong
eben nguling-nguling
dasar dursasana
pintere mung petingtingan
ngece,
nyolong bandane wong
mbadog, lan ngrabeni bojone liyan
26. ORA NGARTI KENTOR
Nyong gedeg
dudu moni ora gelem
waktu kowen takon
"Kang apa rika demen nyong?"
nyong sing sebenere
pancen ora ngarti kentor
apa kuwe sing arane demen
Nyong gedeg dudu moni ora gelem
waktu kowen wuda aplang-aplang
"Kang apa rika gelem nyenengna nyong?"
nyong sing sebenere
pancen ora ngarti kentor .....
27. RAHASIA
rahasia kiye tak cekel
saprene tak umpetna
ning antarane pori-pori
wis tak dadekna kringet karo ambekan
Nggrobyos
nyangga abote sing terus tak gawa mlayu...
28. GETIH COLONGAN
duwit colongan dadi badogan
badogan dadi getih
getih dadi birahi
birahi dadi pejuh
pejuh dadi bocah
bocah dadi menungsa
menungsa sing sikilie pating petingtang
grijagan
ngedek-ngedek apa sing ora
29. MARYATUN
nyong ketemu kowen waktu
serngenge durung duwur
ning wetenge tegal arum
sg banter mlayu ngulon
sedawane dampar
wong sing bayak-bayak
nyong bih peduli
ngadeg nyempedna kowen
ning ngarepe toilet gerbong
..oh maryatun..
sanajan tangane kowen mambu centong warteg
tapi bokonge kowen sg waktu kuwe tak emeg-emeg
..saprene ...
megin mambu wangi....
oh maryatun raimu saiki nang endi....
nyong kangen sajege pisah karo kowen ning pasar senen....
30. PADANG WULAN
padange wulan
sing mluntrah
ning latare atine nyong
nyong diitik-itik
karo semriwinge angin
sing ngejak mesem...
31. ALAM NYLIWAH
udan sing ngrekicek
sedina mbengkeleng
ning sajerone wulan juli
nggawe pitakonan
unsum apa kiye sebenere
udan panas teka ujug-ujug
alam sungsang nggawa mendung
ning latare ketiga
menungsa keder
menungsa bingung
nyawang jagad sing wis nyliwah..
32. KEJEGLONG
kaya perasaan demen
sing kowen tawakna
kowen tak tuku
ning peteng dedete bengi
kiye kesaksian sing ora bakal ilang
waktu nyong kejeglong
ning bolongan
sing nyong ora bakal klalen
....selawase....
33. PUISI GETIH
kata-kata sing tak tulis nganggo tangan kiwa
mangsine abang dadi puisi jiwane nyong
sing saiki terus dadi getih pucuke pedang cintane kowen
waktu kowen balik maning
nyuwek kulit atine nyong, dadi koreng
ning perjalalan
sing akhire dadi terus dadi impen sing blih tau kepenak
langka pudate....
...oh angin...
tak tarik rasa kangen kiye...
sing pernah tak titipna ning kowen...
oh bayu...
tulung siramna geni sing mulad-mulad
geni sing tau dadi lambang cintane nyong karo kae.......
34. ATI SUWUNG
Nyong mangkat lunga seka ati sing suwung
nglewati dalan-dalan ciut sing pating plegok
nganti tekane segara
gebar-gebure ombak karo angin laut
ngater remeng-remenge sore,
dina sing wis mulai peteng ning njerone jiwa
nyong ngliwati bengi kiye
ning ngisore wulan sing katon separo
ning mburine mega mendung sing mlaku
wulan sing ngindik nggrentes
ndelengna nyong turu aplang-aplang
ning nduwure amparan wedi segara
sing nyangga suwunge atine nyong....
35. TURU
wis langka ayang-ayang
anane mung kemreseke angin
aku diwisiki bengi
wis laka apa-apa....
tengah wengi
rasa kelingan sing wis mabur
karo jiwa sing lagi dititipna
suarane napas
alon-alon
ora pengin nggugah ngimpi
36. ATI NYABANG
bengi sing ora bisa turu
merga ati lagi nyabang telu
ning pertelon
nyong ngadeg mandeng wulan
meseme lambe
sing terus dadi ayang-ayang..
37. LANANG BUTA
matane mencilak
kaya serngenge jam rolas
cungure mblesek
kaya pendemen boled
lambene kawer-kawer
kaya wohe nangka
ilere ndlawer
kaya grojogan banyu udan
wetenge mblempo
kaya pedaringan beras
38. ISRO MI’ROJ
sepertelu bengi
lunga manjat tekan pucuke langit
wakile menungsa ngadep sendiko dawuh
ning istana dirajane jagad
balik nggawa prentah kudu
nyembah ping lima sadawane dina
ning antarane lawang-lawang langit sing ngeblag
kanjeng nabi pitakonan
waktu ndeleng menungsa dirajang-rajang
waktu ndeleng sengsarane menungsa
sing ora diakoni hamba..
39. LARA
ngarti ora kowen artine lara
yakuwe jejeran lintang ning langit
kekarepan sing ora pernah tau klakon
ning adohe sikile cakrawala..
40. MARYATI
Ning ngisore langit Jakarta
panase terminal sing ngentak-ngentak
luhe nyong melu ngecembeng
waktu kowen wadul
"prawane nyong wis suwek Kang ning desa
nyong mene sotan..njaluk pangapurane.."
ohhhh.. Maryati...
41. JABATAN
jabatan sing pada dadi kebanggan
tapi nyatane malah dadi rante sing naleni tangan
, sikil karo gulu..
sang mantan sing saiki pada ndlosor,
ngringkel ning nduwure jogan sing cepel
wong nduwe jabatan
saiki kuwe pada bae karo tingkring ning pucuke ri..
42. NYENYET
bengi sayak krasa nyenyet
hawa atis sing nujleb tekan balung
ora gelem merad
ndotor ning emperane ati
sing lagi suwung
ndotor ning emperane ati
sing lagi sutang
43. ALAM DUNYA
ning alam dunya
kasektine menungsa
sektine ilat..
sektine balung kr kulit..
sektine banda kr jabatan..
apa mbesuk bisa nadangi perkule mungkar kr nakir ?..
Ya Allah,
nyong sg bodo ora ngarti apa2,
prangasa adus banyu kembang..
padahal asline gupak ng comberan..
prangasa mangan sing blih papa..
jebule mbadogi jabarantah karo batang...
Ya Allah,
nyuwun dalan ampura
moga mbesuk ora ketemu
raine mungkar nakir sing dadi srigala.....
Bismillahirohmanirrohim
atas nama Sing Nggawe Jagat
nyong pan mlaku karo jiwa
sing wis dibaiát Syahadat............
44. GRAHA
luh sing ngecembeng
ning ngisore wulan dipangan graha
ati sing garing gupak
ning sinare paceklik
menungsa ora kanti lunga
merga bumi selawase dadi alang-alang...
45. AMPURA
Ya Allah Gusti
saprene nyong megin dadi wong
sing ora gabled..
saprene nyong megin dadi wong
sing sering diedek-edek..
mungkin merga nyong salah dedonga..
merga nyong kurang bisa ngartekna
ayat-ayat-te Panjenengan...
Nyong belih tahu gelem ngalem Panjenengan...
Ngaleme mung dunya...
ngertine mung ngresula...
geleme mung nampani...
tapi babarblas blih gelem ndekena sama sekali...
Paringana ampura ya Gusti..
46. BENDERA
nyong weruh bendera lambang partai
sing dikerek ning ngarepe kantor pusat DPP
duwure ngungkuli sang saka merah putih
jebule kepentingan golongan
kuwe pancen luwih duwur
tinimbang kepentingan nasional
jarene atas nama aspirasi
kudune nang bendera partai
bisa nggo ngelap banyu mata sengsarane rakyat
kudune nang bisa nggo ngelap
leteh kelakuan bejade para koruptor...kudune nang bisa dst...
47. KEPARAT
Ambane telak
sing mbadog sejarah
ireng dadi putih
putih dadi ireng
jarene reformasi
jebule mung cocote politisi
sing pada jempalitan luruh korsi
wong-wong sing asline pada mbakar sejarah
njaluke pada ngatur negara
padahal klambine rodal-radil
hasil suwekane bendera abang putih
jarene reformasi,
jebule cocot sing pada ngetokna gula
jebule saiki..ning kene rakyat tetep bae dadi barang rongsokan....
48. WANGWA
Raine kowen sing saiki dadi wangwa
sanalikane ngomong ilat sing murub mulad-mulad
mbakar atine nyong
sedawane ungsum mangsa ketiga
dadi musuh ning njerone selimut..
49. TATAHAN TULISAN
Arti sing ditatah,
diukir,
digubed dadi siji
ning sajerone tulisan,
dadi tugu sejarah
sing terus dibenahi
ning njero lemari perpustakan ati-atine menungsa
tulisan sing bakal terus dikenang
merga hurup demi hurup sing ditrapna,
ngadeg dadi sawijine hakekate urip..
50. SAKRATUL MAUT
sanalikane nyong
kelingan sakratul maut kuwe abot,
nyong wedi ya Allah..
nyong wedi..
kapan kuwe anjog..
waktu roh sing dilorod..
nyong sing ora bakal bisa lunga..
nyong sing ora bakal bisa apa2..
Ya Allah, nyong ngerti kuwe bakal lara..
nyong bakal dewekan..
Ya Allah, mbesuk kapan mbuh sing bakal
teka nyong njaluk dinungi banyu talqin...
nyong njaluk Syahadat...
nyong njaluk khusunul khotimah...
astaghfirulloh hal adzim...
51. SLODOR
bocah rame slodor
ning ngisore wulan
sing mencorong..
nyong seduprak ning ngarepe lawang
ngrongokna lagune bocah
sing lagi pada gemerah..
ohhh.. nyong sing gemiyen playon ngudag-udag jelong..
saiki remek bebeg diudag-udag ewonan masalah..
ohhh... senggane nyong bisa balik maning
dadi bocah sing bebas lan merdeka..
52. BANGKAR
udan sing tembeke bae mandeg
atise negin krasa cemreces tekan balung..
Jam siji bengi kiye nyong durung bisa turu..
ceplik sing tak suled maning
ngancani kentap-kentipe mata ngelang-ngeling rumangsa..
nyong sing wis mlaku adoh
jebule saprene durung bisa ngunduh uwohe lelaku..
bangkar..!
langka apa-apane..suwung..!
nyong sing saprene nyatane terus dadi gedibale roda
sing mbelet ning dalane endut panguripan
53. RUNGSEB
enyong kelangan wulan
sing tak benahi ning nduwure bengi..
enyong takon karo mendung
tapi jawabane mung udan sing ngrekicek..
peteng dedet..
laka damar sadawane dalan..
ayang-ayang dideleg geni
sing sipet didamoni angin..
peteng dedet..
laka damar sadawane dalan..
udan sing ngrekicek..
nggawa ati sing kesasar
saprene durung bisa balik..
Metu sabah luruh rejeki sing pating pluntrah
Dalane takdir dudu pasrah lan mandeg
Tapi kudu terus mlaku
sebab cangkem karo waduk ora bakal mandeg terus kudu diseseli സെഗ
55RAHASIA ATI
Sore wayah grimis..
Banyu sing pating pletik nembangna lagu, irama sentimentil..
Nyong sing nyoba pan nulis puisi.. masalah cinta..
Waktu raine kowen nggamblok ning antarane tembok-tembok kegelisahan atine nyong..
Nyong sing waktu kuwe terus pengin mlayu,
ninggalna lara ning beteme matane kowen..
Tapi kowen tetep lembut lan terus misiki.. nganti saprene dadi suara atine enyong..
Udan sing mulai deres
Nyong mulai ngiyub ning lembute atine kowen sing terus mesem lan ngelus-elus..
Kaya rahime kandungan
Enyong sing saiki lagi dadi bayi,
umpetan..
merga wedi kecipratan atise bayu udan sewu kegelisahan..
Udan sing terus ngguyur nganti bengi
Nyong negin mlayu mobat-mabit nggawak atise rahasia cinta kiye..
Sing pan terus tak umpetna nang ngisore pori-pori....
56WADONANKU
Nggo kowen...
wong wadon sing wis atret nang latare atine nyong....
menekna wis luwih sing sepuluh tahun....
lambene enyong sing kadang nyeset atine kowen...
meres banyu matane kowen....
enyong njaluk pangapura sing sagedene....
mbuh enyong sing belih tau ngarti....
-- apa kuwe sing arane kasih lan sayang --
tapi sing jelas enyong pengin nyenengna kowen....
sanajan kuwe sakuasane enyong...
sanajan kuwe semampune enyong...
dawane dalan sing pating plegok....
udan lan angin..
gludug sing ngampar-ngampar...
kowen nang iringan tetep cekelan tangane enyong...
57MAHSYAR
mbesuk menungsa kuwe pada ngadeg
wuda klontangan lan gedabelan
ning padang mahsyar..
serngenge duwure mung sakilan..
ngenteni siji-sijine menungsa disidang
ning pengadilane Gusti Allah,
awit jamane nabi adam nganti jaman akhir..
rekaman pileme dibuka gebyar..
ditonton sedawane menungsa sing pernah urip..
sing nlembuk katon nlembuk, sing nyolong katon nyolong,.
duh gusti paringana mboten Panjenengan buka aibe kulo..
58KELINGAN
..luh sing mrembes,
mrambat tekan sajerone ati..
mandeg ning idep..
dadi bayang-bayang..
kelingan wong tuwa saiki lagi apa..
ya Allah Gusti,
paringana sehat tiyang sepah kalih kulo..
mboten wonten penyakit punopo-punopo..
waras bergas..lan adem ayem gesangipun..
sanaliko jaman semanten kulo dikudang..
dielus-elus lan ditresnani..
ya Allah Gusti kulo nyuwun panjenengan tresnani
lan barokahi tiyang sepuh kalih kulo..
amin..
59SEPI
bengi saya sepi/
wulan kangslep/.
atis nubles-nubles balung/
ning pojoke waktu/
enyong njagong ngeteter/
ngenteni ati sing digawa angin/
lunga luruh padange lampu petromax/
60MENDEM
enyong mlaku sempoyoran
dudu moni mendem ciu/
tapi mendem merga "raimu"/
enyong getihe manjat tekan gitok
dudu moni bludreg/
tapi kaku merga "raimu"/
sanajan raimu wadon gawanan/
atine nyong ngedablug dibandem saporete watu demen/
raimu pancen wadon siluman/
ayu nemen kaya asu/
sajege denggo/
ning idep terus dadi bayangan/
kadang teka kadang ngeclap/
saprene ati ngenteni/
widadari metu sing alang-alang
61LELARA
bengi sepi/
luh mrembes ning pipi/
ngrongokna angin nggawak crita/
tentang lelagon/
ati sing dilelara/
merga lagi kena goda/
62KEPRIBEN
aku takon "kepriben..?”
kowen semaure "
“ih loken..",
aku takon "apa..?"
kowen semaure "belih..",
aku takon "iya?.."
kowen semaure "aja..",
aku takon "kapan..?"
kowen semaure "ora..",
aku takon "ana..?"
kowen semaure "endi..",
aku takon "uwis..?"
kowen semaure "mbuh..",
akhire aku ora takon apa-apa "mumet !!"
63MARDHOTILLAH
aku klelep nang segara demen..
nganti ora eling daratan..
ngeleg banyu pirang-pirang banyu..
saprene megin ngelak ketemu..
Tidak ada komentar:
Posting Komentar